BANTOANON HINIGUGMA IT GINOO
Kaisot rabuno nak isla sa mapa
Durong ragkong bato, ka isara'y apila
Kakuli ka tubi, tagkon mga tanom
Raha kita halin, banwa it Bantoon.
Kaintik kang bunga, maismot ka raga
Baguntor kahanrig, baktason mahaba
Kaligos sa gaos, kaling kinabuhi
Tiis sa pakasam, kinusoy ag sihi.
Kumpara sa duko, ka tuyar ay pigos
Ugar inding gador, isip magpalimos
A pug-on ka yawas, kag isip, kag kusog
Gutom ka bituka, ka puso ay busog.
Ayag ikahuda pag uma sa duta
Maitum nak yawas, ka kolor ay raga
Maskuladong braso, nupa'y amuyawon
Dahil sa pagtukar, makusog ka tuhor.
Maayam magrasay, maski maintik pa
Pabisong, Domingo, adlaw it pagsimba
Buyan it Setyembre, San Nicolas fiesta
Pilit ma biniray, maging sa Maynila.
Pangutana nako, nagtud-lo ay si-o
Pag ampo, pagtuo sa ato Ginoo
Buko ara halin kang lola ag lolo,
Kang nanay ag tatay? Salamat sa inro!
Ugaling ay asing, kita'y malimuton
Hanrumanang tudlo, ato panublion
Nalimtan kag sanrok, hariney kag ayaw
Nawagit kag altar, uya ey sa bayay.
Ag kung alas sais, oras it orasyon
Mayuhor kang lola, hagar ay bendisyon
Uya't naghuhuman, sobrang kalilisor
kag-ing rarasayan ngase'y television.
Kubos sa kabuhi, kada ambisyon
Raya raya'y notebook, mabaktas pa iskul
Iwag ay lampara, maaray nak gador
gustong maging seaman, abogado, doctor.
Ag kung sa trabaho, ikaw ay sinwerte
Naging manggaranon, pag abroad ay pirmi
Kinang grasya it Diyos, aya gi kalimti
Magbulig, maghatag sa pobre nak hali.
Rein man magpagto, raya raya nato
Maado nak buot, malimpyo nak puso
Mahugor nak anak, uya gi susuko
Ugaling maka-Diyos, ato Maka-ako.
Kung runtog it malas, ika'y ging tuturtor
Sa ato Ginoo, aya gi talikor
Atong Diyos ay hina, aya ni kalisor
Nag-istar sa suyor it tagipusoon.
Beinte singkong tuig sa ato'y naglipas
Biniray patungor Señor San Nicolas
Nagkikita-kita tanang kasimanwa
Nagkukumustahan, kita ay masadya.
Muyati ra kami, mahal namong patron
Imo ipag rasay, tanang Bantoanon
Sa Sibay, Banice, Tumalum, o Togong
Maynila, Mindanao, America't London.
Kung sa kinabuhi kami'y nagransa-ey
Hesus, pagkarapa, patawara yangey
Sa langit ka tanan, kita ay mapagto
Bantoano'y gugma it ato Ginoo.
09/15/2007
Walang komento:
Mag-post ng isang Komento