17 Enero 2013

Pagdiriwang ng Kristong Hari: Pasasalamat ng Diyosesis ng Romblon



      Idinaos ang Dakilang Kapistahan ng Kristong Hari noong nakaraang Nobyembre 26  sa buong Diyosesis ng Romblon bilang taunang pasasalamat ng mga mananampalataya sa buong taong bigay na mga biyaya ng Diyos. Marami ang nag-alay ng kanilang mga ani gaya ng palay, saging, kamote, kamoteng-kahoy, mga prutas, at sari’t-saring sariling produktong gulay. Marami din ang nag-alay kung wala silang sariling taniman ng cash, mga de-lata, noodles, sabon at iba pang mga produkto at gamit na nabibili sa tindahan.
       Sa Parokya ni San Jose, Kabiyak ng Mahal na Birhen, Looc, Romblon ay sinimulan ang pagdiriwang ng kapistahang ito sa pamamagitan ng prusisyon, sinundan ng banal na misa at sa huli ay nagkaroon ng kaunting kasiyahan sa pamamagitan ng “bingo social”.  Naging mahaba ang pila ng mga nag-aalay sa loob ng misa sapagkat dala-dala ng mga mananampalataya ang kanilang mga alay-pasasalamat sa Panginoon. Pagkatapos ng misa, halos lahat ay naging masigla sa pagsisimula ng bingo-social at masayang naghihiyawan pa habang naglalaro. Marami ang nagsabing “nakapaglaro ka na, katatulong ka pa…sa simbahan”, ang wika ng karamihang umuuwing nakangiti at ang iba nama’y umuwing dala ang kanilang mga pinanalunan.
        Sa halos parehong pagkakasunod-sunod ng daloy ng talatakdaan ay ipinagdiwang din sa iba’t-ibang mga parokya ang kapistahang ito lalong-lalo na sa Parokya ni San Vicente Ferrer, Odiongan, Romblon. Sa kabila ng maayos na kapi-kapilyang pagtawag para sa pag-aalay ay halos tumagal pa rin ng kalahating oras at marami pa ang mga naghahabol upang ibigay ang kanilang mga alay.
Ang ating mga kaparian din sa seminaryo ay bumaba sa bayan upang makiisa sa napakahalagang pagdiriwang na ito ng ating simbahan upang bigyang halaga ang pagiging Hari ng ating Manunubos, si Hesukristo.
         Kasabay ng selebrasyong ito, ay inilunsad din sa buong Diyosesis ang pagbubukas para sa taon ng pananampataya o tinatawag natin sa Inglés na “Year of Faith” na nagsimula sa ating Diyoses ngayong taon (2012), Nobyembre 25 hanggang sa susunod na taon (2013), Nobyembre 24. Ang pangkalahatang pagdiriwang na ito ay ipinahayag ng ating Papa, Beneto XVI, kasabay ng  paglathala ng kanyang Sulat Apostoliko, “Porta Fedei” noong ika-11 ng Oktubre 2011.


1 komento:

Tiradauno ayon kay ...

Gusto mo ba ng online work?
Earn while you enjoy time with your Family & Lovedones!
Email me: tirade_uno_23@yahoo.com
For more details, kindly visit http://www.unemployedpinoys.com/